БАЧ/РУСКИ КЕРЕСТУР – Млади каратисти рускокерестурского Русину освоєли аж 14 медалї на вчера отриманим Карате-турниру „Бач 2016”, хтори у Бачу традицийно орґанизує домашнї Карате-клуб „Партизан”. На Турнире ше змагали коло 200 змагателє зоз 17 клубох з Войводини.
За Карате-клуб Русин наступели 11-еро змагателє, од когуцикох по сениорох и у конкуренциї когуцикох, екипа Русину у катох освоєла перше место. Екипу творели Иґор Фейди, Мирко Малацко и Иван Медєши, котри у поєдинєчней конкуренциї у катох освоєли кажди друге место, як и Ґлориян Штранґар, котри ше змагал у конкуренциї когуцикох и пионирох.
У борбох у катеґориї пионирох перше место освоєл Теодор Няради, а спомнути Штранґар 2. место.
У конкуренциї кадетох у борбох Сара Планчак и Анамария Няради освоєли перше, а Кристина Катона друге место.
Йована Ноґавица освоєла друге место у борбох у катеґориї юниоркох, а Деян Кормош перше место у борбох у конкуренциї сениорох.
Судия на тим змаганю була и Вероника Юрич з Руского Керестура, а одход до Бачу спонзоровали и родичи младих каратистох.