РУСКИ КЕРЕСТУР – У нашим Марийовим святилїщу Водици, пондзелок, 20. априла була акция на його ушорйованю пред ютрейшим шветом велїкомученїка Георгия – Дзуря по григориянским календаре, з хторим почина и тогорочна сезона богослуженьох у Водици.
У Водици вибетонована єдна часц коло студнї и лєтного пристолу, покошена трава, а маляре обцагли фасаду на Водицовей церкви.
Роботи финансовани з пенежу хтори даровали двойо керестурски парохиянє, а добродзечнє их окончели прейґ 20 особи – члени Церковного одбору и други порядни добровольци.
На ютре у керестурскей парохиї Дзуря, та з тей нагоди Велька Служба Божа на 10 годзин будзе лєм у Водици, з традицийним пошвецаньом младого жита. Служби Божо у катедралней церкви буду на 8 и 19 годзин.