ВЕРБАС – З Округлим столом пошвеценим положеню ромскей националней заєднїци у тим штредку и виставу фотоґрафийох у центре городу, пияток, 8. априла, у Вербаше другираз означени Медзинародни дзень Ромох.
На Округлим столє участвовали представителє локалней самоуправи, Червеного крижу, Центру за социялну роботу, основних школох и других институцийох, а бешедовало ше о терашнїм положеню Ромох и можлївосцох унапредзеня їх социялного статусу.
На вистави фотоґрафийох опрез будинку Општинскей управи приказани найзначнєйши Роми з цалого швета, котри витворели значни успихи у рижних обласцох.
Членїца Општинскей ради Вербас задлужена за социялни питаня Даниєла Илич з тей нагоди гварела же вербаски школи – ОШ „Братство єдинство” и Штредня фахова школа „4, Юлий”, з ище осем школами у Сербиї – уключени до проєкту „Застановйованє осипованя дзецох з образовней системи”, з цильом же би ше ромски и други материялно загрожени дзеци затримало у образовней системи.
Лаицки пастор Євангелскей церкви у Коцуре Александар Суботин гварел же Роми у локалним штредку задовольни з тим цо за остатнї роки поробене на злєпшованю їх положеня.
– При вирабяню социялней карти зявели ше одредзени проблеми и Роми ше вияшнєли же су нє задовольни. Медзитим, остатнї час обачлїве же дискриминация барз зменшалн. Институциї у општини Вербас барз отворени и сцу помогнуц – гварел Суботин и додал же Євангелска церква у Коцуре у вербаскей општини постала препознатлїва и по орґанизованю числених гуманитарних акцийох.
Општина Вербас тераз роби на Локалним акцийним планє за Ромох, при його виробку будзе консултована и ромска национална заєднїца, а План би мал буц закончени до конца рока.