У Горватскей меншински виберанки, Руснаци маю 79 кандидатох

автор аба
1k Опатрене

ГОРВАТСКА – У Горватскей на ютре, 31. мая, виберанки за членох радох и представительох 22-ох националних меншинох у єдинкох локалней и подручней (реґионалней) самоуправи у жупанийох, городох и општинох.

Як гварели з Державного виберанкового поверенїцтва, буду вибрани вєдно 288 ради националних меншинох у жупанийох и Городзе Заґреб (хтори ма статус жупаниї), у городох и општинох, та 173 представителе меншинох, за цо кандидовани коло 6 500 особи. За вибор меншинских радох до виберацкого списку уписани вєдно 278 932, а за вибор представительох 24 399 вибераче.

За ради, односно представительох рускей националней меншини кандидовани 79 особи, 61 хлоп и 18 жени. На основи числа припаднїкох, Руснаци членох своїх радох буду виберац у Вуковарско-сримскей жупаниї, Городзе Вуковар и општинох Томпоєвци и Боґдановци. Представительох буду виберац у Осиєцко-бараньскей жупаниї и у Городзе Заґреб.

Кандидатох могли кандидовац здруженя, лєбо ґрупи гражданох. Виберанки нєпоштредни, з тайним гласаньом, а мандат вибраних будзе 4 роки.

Меншински ради и представителє совитодавни цела у локалних и подручних (реґионалних) самоуправох и закладаю ше за злєпшованє стану своєй националней меншини, а як здружени до Координациї радох, и на уровню держави.

Резултати виберанкох буду обявени найпознєйше 1. юния до 19 годзин.

ПОВЯЗАНИ ТЕКСТИ