У Керестуре означени Дзень планети Жеми

автор сен/маф
804 Опатрене

РУСКИ КЕРЕСТУР – З едукативнима роботнями и писнями з тему яри и природи, наймладши Керестурци вчера на програми у Доме пензионерох и у Дзецинскей заградки „Цицибан” означели Дзень планети Жеми. Понеже заґадзованє и очкодованє природи вше присутнєйше, уж од малючка дзеци треба учиц и усадзиц им свидомосц о защити животного штредку, поручела предсидателька керестурского Еколоґийного руху „Желєни персцень” др Леона Доротич Ґутеша.

На програми пошвеценей Жеми и нашому околїску, хтору вчера у Доме пензионерох орґанизовал Еколоґийни рух „Желєни персцень”, присутних привитали др Доротичова, предсидателька Управного одбору „Желєного персценю” Лїляна Соколова и директорка Основней и штреднєй школи з домом школярох „Петро Кузмяк” Хелена Пашо Павлович. Дзеци предшколского возросту и школяре трецих и штвартих класох ОШ, зоз своїма учительками, за тоту нагоду пририхтали шпиванки, рецитациї и танєц, а наступел и керестурски кантавтор Сашо Палєнкаш.

З нагоди Дня планети Жеми „Желєни персцень” традицийно школяром дзелї древка, а того року саднїци пауловниї подаровал Синиша Мали з Коцура. По 10 древка достала Школа „Петро Кузмяк” и керестурска парохия, а на програми дзеци достали и кнїжки, хтори за тоту нагоду подаровала Новинско-видавательна установа „Руске слово”.

Дзень планети вчера окреме означени и у керестуркей Дзецинскей заградки „Цицибан” ПУ „Бамби” з Кули. У шицких воспитних ґрупох, окрем у яшелькових, прикладно возросту воспитачки з дзецми робели на тему Дня планети жеми, а найстарши предшколци тей теми пошвецели цали тидзень.

О планети и єй чуваню бешедовали перше теорийно, а знанє утвердзели и з практичнима роботнями, на хторих мальовали, вирабяли предмети з пластелину, рисовали планету и живи швет, а дзепоєдни посадзели и квеце у дворе Дзецинскей заградки.

ПОВЯЗАНИ ТЕКСТИ