НОВИ САД – Рубрика „Тижньовнїк” у двацец осмим тогорочним чишлє новинох „Руске слово” пише о запровадзованю Акцийного плану за витворйованє правох националних меншинох, а ту и вистка о подписаним Протоколу о сотруднїцтве медзи Заводом за културу войводянских Руснацох и Општину Шид.
„Нашо места” информую о керестурским Медзинародним волонтерским кампу и планованей нащиви паломнїкох на коньох до Руского Керестура, а зазначене и як огньогасци орґанизовали роботу през жатву. „Економия” пише о младих малинарох у Коцуре.
На бокох „Култури и просвити”, медзи иншим, текст о госцованю Дюрдьовчаньох на Фестивалу у Польскей, а ту и вистки о активносцох аматерох у Вербаше и Шидзе.
„Мозаїк” читачом преноши атмосферу з Фестивалу Еґзит, а рубрика „Людзе, роки, живот” представя Вадаскових фотоґрафох з Коцура.
На „Духовним живоце” тексти о преславох кирбаю у Будисави, Змаєве и Новим Садзе, док „Спорт” понука розгварку з др Михайлом Лїкаром, атлетичаром професора Яшу Бакова.
„Спорт” пише и о вельким успиху Михаила Дудаша на Европским першенстве у атлетики, а як додаток у тим чишлє „Дом и фамелия” з нову „Женоблоґию”.