НОВИ САД – Понеже ше законски термин за обовязне приватизованє локалних електронских медийох закончує 30. юния, а найскорей нє будзе предлужовани, у Покраїнскей влади вчера отримана роботна схадзка на хторей розпатрани шицки доступни молївосци же би єден спомедзи тих медийох – Явне подприємство за информованє „Вербас” – и после спомнутого датума предлужел основну дїялносц и, як и дотераз, информовал локалну заєднїцу на штирох язикох – по сербски, руски, мадярски и українски.
На схадзки у Покраїнским секретарияту за културу и информованє, на хторей домашнї бул помоцнїк секретара за медиї Калман Кунтич, участвовали и предсидатель Општини Бербас Братислав Кажич, заменїца предсидателя Ксения Бенце, директорка ЯПИ „Вербас” Весна Роґанович, и предсидатель Одбору за информованє Националного совиту Руснацох Иван Сабадош, понеже по скорейшей догварки, НС Руснацох у случаю вербаского медию заступа интереси шицких трох меншинских националних заєднїцох.
Окреме розпатрани можлївосци формованя явно-приватного партнерства у обласци информованя на локалним уровню, а важне визначиц же шицки заинтересовани страни – покраїнски институциї, локална самоуправа и национални совити меншинских заєднїцох, согласни же потребне отримац нєшкайши уровень, структуру и обсяг информованя гражданох Општини Вербас.