ШИД – У Културно-образовним центре Шид и у Руским доме, односно КПД „Дюра Киш”, нєшка и на ютре, 1. и 2. октобра, у Шидзе будзе перши Медзинародни мултижанрови фестивал руского филму „Русин Филм Фест”. Фестивал нєшка будзе отворени на 15 г. у Културно-образовним центре з ретроспективу 8 филмох чия тема Русини/Руснаци, а у цалосци будзе приказани филм „Траґедия Галицкей Руси”, автора и режисера Алексея Денисова з Русийскей Федерациї.
На ютре, 2. октобра, тиж на 15 г., у КПД „Дюра Киш” будзе Трибина з тему „Руснаци/Русини/Лемки у Першей шветовей войни”, после того буду приказани 2 филми, медзи нїма и познати „Душа Картпатох” (Словацка), як и перши филм Русинох/Руснацох з 1934. року. Обидва днї будзе орґанизована и културно-уметнїцка програма.
Фестивал будзе отримани з финансийну потримовку Општини Шид и Покраїнского секретарияту за културу, явне информованє и одношеня з вирскима заєднїцами АП Войводини, а орґанизаторе наявели приход представитель трох амбасадох у Сербиї – Русийскей, Билорусийскей и Словацкей.
Попри високих державнїкох зоз Сербиї, домашнї у Шидзе обчекую и госцох зоз жемох дзе у штреднєй Европи жию РРЛ, як и членох Шветового конґресу Русинох/Руснацох/Лемкох (РРЛ) и його Шветовей ради.
Перши Медзинародни мултижанрови фестивал руского филму „Русин Филм Фест” орґанизує Реґионални одбор Рускей матки (РМ) за Срим у Шидзе, а у рамикох активносцох Шветового конґресу РРЛ и його Шветовей ради, як и активносцох РМ у Сербиї.