ШИД – У Куковцох у општини Шид национална директорка Фондациї „Новак Дьокович” Єлена Дьокович штварток, 29. септембра отворела сучасну адаптовану Школку живота, до хторей буду ходзиц коло 50-еро дзеци предшколского возросту з того валалу, хтори после войни 90-их рокох населєли вибеженци з Републики Горватскей.
Школку, як и седем пред тим у Сербиї, адаптовала и опремела Фондация „Новак Дьокович” и до оправяня и ушореня двох учальньох у Куковцох, поверхносци 100 квадратни метери, меблю, за дидактични материял и кнїжки Фондация уложела коло 40 000 еври. Єлена Дьокович з тей нагоди дзецом подаровала и бависка.
На пригодней шветочносци, на хторей були представителє локалней самоуправи, на чолє з предсидательом Општини Шид Предраґом Вуковичом, на тим вельким гуманитарним поцагу Фондациї и панї Дьокович подзековала директорка Предшколскей установи „Єлица Станувукович Шиля” Ясмина Варґа.