НОВИ САД – Конститутивна схадзка Роботного цела за младеж Националного совиту (НС) Руснацох отримана всоботу, 7. фебруара, у просторийох Заводу за културу войводянских Руснацох у Новим Садзе, а попри урядового конституованя того цела, на дньовим шоре було и прилапйованє Дїловнїку о роботи, Плану роботи и Финансийного плану Роботного цела за 2015. рок. На констутутивней схадзки Роботного цела були 11 з 12 членох, як и предсидатель Вивершного одбору НС Руснацох Желько Ковач и секретар Совиту Таня Арва Планчак.
По Одлуки НС, на чолє Роботного цела за младеж член Совиту Сашо Сабадош зоз Зомбора, а медзи єденац членами по двойо з Руского Керестура, Коцура, Дюрдьова, Нового Саду и Вербасу, и єден член зоз Шиду. На конститутивней схадзки предложене же би членство було преширене за ище єдного члена, з Нового Орахова, а о тим предкладаню вияшнї ше НС на шлїдуюцей схадзки.
Спрам прилапеного Плану роботи, Роботне цело за младеж и у тим зволаню будзе финансийно потримовац проєкти младежских здруженьох Руснацох, а тиж и орґанизовац свойо змисти наменєни младим у наших местох. Будзе сотрудзовац на проєктох хтори реализую други руски институциї и цела НС Руснацох, а нове зволанє Роботного цела за младеж окреме порихтане активнєйше розвивац медзинародни и медзиреґионални сотруднїцтва, хтори оможлївени з нєдавно подписаним Спорозуменьом АП Войводини и Пряшовского самоуправного краю у Словацкей.
По препоруки Вивершного одбору НС, Роботне цело за младеж прилапело рамикови финансийни план, хтори предпоставя же буджет за младих будзе як и Одбору за младеж и спорт у прешлим зволаню – 350 000 динари. Роботне цело 160 000 динари наменї за помоц проєктом младежских здруженьох Руснацох, цо ше будзе розподзельовац по конкурсох, 110 000 за змисти хтори Роботне цело будзе орґанозовац по наших местох, и 80 000 динари за активносци у обласци медзинародного сотруднїцтва.
У случаю же достанє векши средства, Роботне цело за младеж пририхтало и алтернативни финансийни план, по хторим за спомнути три ґрупи активносцох предвидзени векши виноси.
