ВИРАВА/УБЛЯ/СНЇНА (СЛОВАЦКА) – Всоботу и внєдзелю, 15. и 16. октобра, Хор „Гармония” з Нового Саду госцовал у Словацкей, дзе наступел у Вирави, Ублї и на Фестивалє Духовней писнї у Снїни, дознава Рутенпрес од директора Хору Борислава Сакача.
У Вирави наш Хор всоботу, 15. октобра, наступел на пригодней културно-уметнїцкей програми з нагоди 150-рочнїци народзеня Михайла Врабеля, а пред тим, у Врабельовим родним месце, на Семинаре з нагоди спомнутей рочнїци участвовали и нашо публицисти Дюра Латяк и Микола М. Цап,.
На програми Хор „Гармония”, под дириґентством Сузани Ґрос Маркович и провадзеньом Давора Сабу на гармоники, одшпивал пейц шпиванки хтори у наших крайох записал праве Михайло Врабель.
Участвовала и Шпивацка ґрупа „Лабирски бетяре” з Видранї и Медзилаборцох, а програма отримана и з нагоди отвераня реконструованей сали Културного дому у Вирави, у орґанизациї Союзу Русинох-Українцох Словацкей (СРУСР), места Вирава и спомнутого Културного дому, так же госцом домашнї були член Предсидательства Централней ради СРУСР Иван Лаба и старостка места Моника Куртякова.
Хор и госци зоз Сербиї, медзи нїма и предсидатель Союзу Руснацох Українцох Сербиї Боґдан Виславски и директорка Руского културного центру Нови Сад Наташа Макаї Мудрох, у Вирави присуствовали и на Панахиди за Михайла Врабеля, а нащивели и гроб його брата, тиж учителя, Георгия Врабеля.
Пред наступом на Фестивалє у Снїни, новосадски Хор внєдзелю шпивал часц Служби Божей у грекокатолїцкей церкви св. о. Миколая у Ублї, а Службу служел домашнї священїк о. Мирослав Пружински.
На 26. Фестивалє духовней писнї у Снїни, внєдзелю 16. октобра, Хор „Гармония з Нового Саду виведол пейц духовни композициї, у дзепоєдних солистка була Ана Римарова, а з иножемства на Фестивалє участвовали и три хори з України – Дзецинскей школи уметносци з Велького Березного, Українски грекокатолїцки катедрални хор „Кредо” з Ужгороду и Хор хлапцох и леґиньох Мукачовскей хорскей школи з Мукачова. Домашнїх представял Грекокатолїцки хор храму Успения Пр. Богородици з Рускей Поруби, Женска шпивацка ґрупа „Старинчанка” зоз Снїни и шпивацки дуети.
Фестивал орґанизовал Союз Русинох-Українцох Словацкей, вєдно з местом Снїна и Месним културно-просвитним центром, а одход Хору и делеґациї на Семинар орґанизовал Союз Руснацох Українцох Сербиї.