Оштра политична борба актуалней власци процив каждого гласу хтори твердзи же „цар голи”, после медийних нападох на новинарох и новинарки, предсидателя Сербскей академиї наукох и уметносцох и углядни мена зоз швета уметносци и култури, нєдавно предлужена зоз понїщованьом докторату на правним факултету у Новим Садзе. Зоз тим лїстина политично нєподобних нєистодумнїкох нє заключена, а понеже чечуци мандати лєм цо розпочати, з часом найскорей будзе и преширена
Нєт дилеми же слово о строго политичней борби и мотивох. У сучасним политичним дружтве, яке ше розвива од Французкей буржоазней револуциї по нєшка, политична борба то леґитимна борба, як цо и шицки єй средства леґитимни. Аж и война леґитимне политичне средство, медзинародно озаконєне у правних рамикох Женевскей и пошлїдкових конвенцийох. Так же, правни, економски и подобни баламути у политичней борби, випатра, цалком бениґна ствар.
Проблем, медзитим, же кажда политична опция, на шицких меридиянох, криє же циль тей борби нє витворенє общого, алє власного парциялного интересу и здобуванє тоталней власци. Од случаю по случай маме поволованє на гришки у процедури, як у случаю др Слободана Белянского, морал, як кед преволовани др Владимир Костич, предсидатель САНУ, а найчастейше голу политичну тарґовину, як у случаю академско-будовательних акцийох Муамера Зукорлича.
Рижнородносц мотивох и механїзмох з хторима власц потримує союзнїкох и дискредитує нєистодумнїкох указує праве сущносц политичней борби, а правну систему кладзе там дзе є и наисце у политичним дружтве – технїчне средство за очуванє власци а нє виказ дружтвеней правди. З другого боку, и процивнїки актуалней власци хтори твердза же „цар голи” з тим твердзеньом, у ствари, нє критикую сущносц, понеже дзеля исту идеолоґийну свидомосц политичного дружтва. И вони ше, углавним, поволую на процедури, морал, односно политичну тарґовину. Права критика почнє аж зоз сущним питаньом: А нач нам вообще цар, та гоч и облєчєни?
Становиска висловени у тим тексту виключно авторово и нє вше одражую ушорйовацку политику новинох „Руске слово”.