НОВИ САД – На Перши дзень Крачуна, 7. януара, владика кир Георгий Джуджар зоз декретом преглашел Церкву св. апостолох Петра и Павла у Новим Садзе за конкатедралну церкву Епархиї св. Миколая (першу церкву до катедрали, конкретно у Руским Керестуре).
Тото преглашенє владика кир Георгий обнародовал у полней Церкви св. апостолох Петра и Павла на Архиєрейскей Служби Божей св. Василия Велького, на хторей сослужел парох новосадски о. Юлиян Рац, а шпивал Хор „Гармония”.
– Цала Церква, цо значи и ми, славиме рождество Христово, бо Бог послал Сина свойого же би нас ошлєбодзел од гриха, одкупел и же бизме мали живот вични. Исус приходзи до наших шерцох кед го сцеме. А ми треба же бизме заслужели одкупенє и мир зоз своїм животом – гварел владика Джуджар у своєй казанї о Крачуну.
На концу Служби парох о. Юлиян подзековал владикови.
– Модлїме ше же би наша парохия оправдала довириє конкатедралней церкви. Жадам же би нас народзени Исус Христос благословел и же би нас наш владика водзел у наших християнских животох. Жадам нам вельо святосци. Шерцо ми полне, же Бог видзи нашо молитви и людзох хтори го любя – гварел о. Рац.
Дзень пред тим внєдзелю, на 21 годзин, Вельке повечериє, крачунске всеночне служели тиж владика кир Георгий Джуджар и парох о. Юлиян Рац. И попри жимней хвилї и шнїгу, вирни пришли на Всеночне, а потим було и друженє и колядованє у церковней сали.