За мнє черанка студентох на хторей сом бул у Шпаниї дефинитивно єден з найкрасших периодох у живоце. У тим чаше ше єдноставно шицко поскладало – период живота, дружтво, госцолюбивосц народу и ище вельо того.

Штредком януара 2019. року моя товаришка зоз факултету Наташа и я сцигли до Шпаниї. За черанку студентох зме ше вєдно опредзелєли пол рока скорей и теди зме ше порадзели же би найлєпше було кед бизме пошли у лєтнїм семестру штвартого року. Так зме мали досц часу же бизме ше порихтали за драгу, а и же бизме покончели шицки обовязки коло факултету. Иншак, нє спомнул сом же зме студирали на Природно-математичним факултету у Новим Садзе, на департману за ґеоґрафию. На тот поцаг зме ше вєдно опредзелєли понеже вше лєгчейше кед у цудзини маце дакого кого познаце и кед сце нє сами. Кед зме ше приявйовали на черанку, у понукнуцу зме мали ище даскельо держави – Польску, Чешку итд., алє ми ше опредзелєли за Шпанию прето же зме жадали упознац шпанску културу, обичаї и народ.

Город у хторим зме жили вола ше Алкала де Хенарес. То студентски город хтори ше находзи лєм трицец пейц километери од Мадрида. Город кущичко менши од Нового Саду, так же є, по моїм думаню, идеални штредок за живот.

У квартелю сом жил зоз пайташку Наташу и зоз ище двома колеґами, Андрияном и Михайлом, хтори тиж так студирали на Природно-математичним факултету. Вельо того олєгчане кед жиєце зоз нашима людзми у странскей жеми. Єдноставно вше сце ту єдни за других. У квартелю у хторим зме жили кажде мал свою хижу, а купатило, кухню, дньову хижу и терасу зме дзелєли. Студентски живот зна буц барз интересантни кед маце добрих цимерох. Єдини нєдостатох хтори бим могол видвоїц то же кед бисце жили з даким хто зоз другей жеми, гоч би було чежше спорозумиц ше з тоту особу, лєгчейше и швидше бисце звладали язик. Зна ше хтори найлєпши рецепт за ученє нового язика – бешеда. Гоч нє бешедуєце по шпански, кед же ше упознаце з даким, вшелїяк пробуйце ше споразумиц з тоту особу, бо вам нїхто нє вежнє за зле же нє знаце перфектно шпански зик. То єдна з лєпших стварох  хтора ми ше попачела у Шпаниї, тот їх менталитет и опущеносц… За дакус вецей як пейц мешаци цо сом препровадзел там, думам же сом досц того научел, а вшелїяк же найзаслужнєйши локални людзе хтори ше нє вишмейовали з мнє, алє ми давали ище векши порив же бим учел шпански.

Черанка функционовала на тот способ же зме доставали мешачну стипендию, з хторей зме плацали квартель, єдзенє, путовали зме, а наша єдина обовязка була же бизме поряднє ишли на шицки преподаваня и вежби цо зме мали на факултету. Барз ми ше пачело тото же зме мали часу путовац, як по Шпаниї, так и по других державох. Нащивел сом шицки населєня хтори ше находза у околїску Мадрида, як цо то дакедишня престолнїца держави Толедо, Сеґовия, Аранхуес. Ишол сом зоз цимерами до Портуґалиї на пейц днї, а аж зме мали нагоду нащивиц и острово Тенерифе хторе припада Канарским островом. Єден дзень зме закупели авто и пошли зме на два днї до Валенсиї. Досц того зме обишли и то за мали пенєжи, прето же студенти у Шпаниї маю рижни вигодносци и попусти. Кеди ґод би ми було допито, прешейтал бим ше до центру города, дзе ше скоро кажди вечар отримовали рижни случованя и манифестациї. У просеку сом кажди треци дзень одходзел до Мадриду з цимерами, дзе зме нєпреривно шейтали и упознавали ше зоз городом хтори, по моїм думаню, дефинитивно найкрасши город хтори сом потераз нащивел. Єдно з найвекших жаданьох ми було же бим нащивел фодбалске змаганє, розуми ше, Реала зоз Мадриду и тото жаданє ми ше и витворело.

У Шпаниї сом себе нашол екипу зоз хтoру сом поряднє бавел фодбал. То були тиж так студенти на черанки, зоз Мексика, Французкей, Италиї, Нємецкей, Боливиї и Колумбиї. З велїма сом ше и сприятелєл. Цо ше дотика ноцного живота у Шпаниї, вон приповедка за себе. Исную рижни клуби до хторих мож висц и то зоз вельким вибором музики. Найбаржей ми ше пачело же у клубох нєт столи як у нас, алє шицко подиюм за танцованє и шицки танцую и забавяю ше. На самим концу ознова бим наглашел же тот период дефинитивно найкрасши период у моїм живоце. Вельо того нового сом видзел, дожил и научел. Кажди дзень сом преживйовал дацо инше, упознал сом велїх людзох и здобул нових приятельох зоз хторима сом и после даскелїх рокох у контакту. За мнє таки искуства представяю нєпреценїви богатства за чловека и совитовал бим и другим студентом же би пошли на чераку студентох.