РУСКИ КЕРЕСТУР – Тогорочни 55. Фестивал рускей култури „Червена ружа“, хтори мал буц отримани концом юния, а преложени є пре нєсподзивану шмерц Юлияна Рамача Чаму, будзе отримани 1. и 2. октобра у Спортскей гали. Пририхтованя уж починаю, та на вчерайшей схадзки Орґанизацийного одбору утвердзени термини програмох, як и технїчни активносци у пририхтованю Фестивалу.
Понеже єдна часц змистох – Привредни саям и Спортски бависка отримани у першобутним термину, перши викенд у октобру будзе отримана културно-уметнїцка програма. Шицки учашнїки котри мали наступац потвердзели свойо участвованє и у новим термину.
„Червена ружа“ почнє на соботу, 1. октобра, на 16 годзин кеди у голу Спортскей гали будзе отворена вистава авторки Андєлки Античевич зоз Беркасова. „Червене пупче“ почнє на 16,30 годзин, а од 20 годзин публика годна, после рокох паузи, ознова уживац у „Одгукох з ровнїни“. После програми на „Пупчу“ звичайно орґанизовани диско, а понеже у гали за тераз нєт одвитуюце место, орґанизаторе попробую найсц простор у хторим би ше розвага за наймладших заш лєм отримала.
Нєдзельова програма почнє на 18 годзин зоз змагательну часцу за найкрасши дзивоцки и леґиньски глас, а потим у ревиялней часци будзе отримани мини-концерт на хторим буду виведзени композициї зоз компакт диску „Лєм єден погляд“ Златка Русковския. Шветочни концерт, на хторим традицийно наступаю найквалитетнєйши ансамбли, почнє на 20 годзин.
Як гварене на вчерайшей схадзки, цена уходнїци за єден дзень будзе 200 динари, а орґанизаторе наявели же на трибинох будзе места за коло 560 патрачох.
