КОЦУР – Вчера у коцурскей Основней школи „Братство єдинство” преславени Дзень школи, з нагоди хторого нє було настави, алє орґанизовани числени спортски, културни, образовни и забавни активносци за школярох.
Перша активносц було змаганє за найкрасшого хижного любимца у школским дворе, а потим ше школяре змагали у фодбалє, одбойки и штафетних бавискох и участвовали на подобовей колониї у лєтнєй учальнї.
Було орґанизоване и змаганє у правеню фризурох, як и предметох з леґо-коцкох, язични квиз и роботня правеня икебанох. У єдней з учальньох була виложена вистава подобових роботох, а найвецей уваги прицагло змаганє у караоке шпиваню.
Як за Рутенпрес виявела директорка Школи Славица Байор, означованє Дня школи того року було унапрямене на школярох. Шицки активносци орґанизовал наставни кадер, а кажди школяр ше могол пренайсц у даєдней, указац свойо схопносци, и крашнє ше забавиц.