СЕРБИЯ – З нагоди вчерайшого Медзинародного дня медийох, Нєзависне здруженє новинарох Сербиї (НЗНС) и Здруженє новинарох Сербиї (ЗНС) орґанизовали акцию „Пейц минути громкей цихосци”, з чим з тоту медзинародну акцию явносц спозорели на вше чежше положенє новинарох и других роботнїкох у медийох у Сербиї.
НЗНС поволало медийских роботнїкох же би ше вєдно спроцивели дальшому понїжованю новинарскей професиї и на врацанє довирия гражданох.
– Улога и циль медийних роботнїкох муши буц шлебодне и одвичательне информованє явносци, а нє сполньованє жаданьох политичних и економских моцнїкох. Держава и власц длужни новинаром и медийом у Сербиї обезпечиц условия за шлєбодну роботу у интересу гражданох, без прицискох и цензури – гвари ше у сообщеню НЗНС и додава же новинаре и други медийни професионалци вше худобнєйши и поодпущовани з роботи.
ЗНС з нагоди 3. мая – Шветового дня медийох, обявело Преглашенє у хторим визначене же „шлєбода медийох у Сербиї озбильно загрожена, бо новинарство нє було у чежшим економским положеню у новшей историї”.
ЗНС поволало новинарох и медийских роботнїкох же би вчера од 11,55 до 12 г. претаргли програми у електронских медийох и пречитали Преглашенє, а тиж наглашене же „пре приватизованє, коло 1 000 новинаре и медийни роботнїки остали без роботи, а даєдни з нїх и без законского права на социялну програму”.
Медзинародна орґанизация Фридом гаус Сербию и того року по шлєбоди медийох учишлєла на лїстину часточно шлєбодних жемох.