НОВИ САД – Програма Трецей манифестациї „Литературиюм”, того року з тему „З вонка рамикох” у Руским културним центре (РКЦ) у Новим Садзе пияток, 27. новембра отворена з виставу фотоґрафийох Андреи Новак з Коцура. Була то єй друга самостойна вистава уметнїцких фотоґрафийох, а у РКЦ представени портети рижних особох. Новакова приказує емоциї людзох, їх роздумованя, чувства и живот през їх очи, а интересує ю и документарна фотоґрафия.
Потим представена друга збирка поезиї Асї Папуґа з Руского Керестура – „Гришка”, хтора ма штири циклуси. Асйово писнї без наслова, кажда то єдна хвилька, а збирка поезиї цалосц тих хвилькох, поведзене на представяню. Папуґова з публику подзелєла свойо два писнї, а з тей нагоди пречитани и виривки з двох рецензийох тей кнїжки.
Госц на представяню творчосци младих у РКЦ була уж афирмована поетеса Тамара Хрин з Руского Керестура, котра попри по руски, поезию пише и по сербски. Здогаднуте же 2014. року Тамара була побиднїца на познатим Фестивалє поезиї младих у Вербаше и за награду єй друкована кнїжка „Седма фарба нєба”, на сербским язику, з хторей Хринова пречитала даскельо писнї. Активна є и на других конкурсох, провадзи и трибини и стретнуца поетох.
На концу интересантней програми Иґор Горняк-Пишта з Коцура першираз представел реп-албум Pišta & Reepgun „Open mind”, хтори вишол як додаток младежского часопису МАК, а знял го вєдно з Мирком Преґуном. Їх робота и сотруднїцтво було приказане на видео-знїмку, а на програми Пишта одреповал два писнї – „Лєм дзеци” и „Ту”.
