ВЕРБАС – Городски музей Вербас и того року будзе участвовац у манифестациї „Музеї Сербиї, дзешец днї од дзешец до дзешец”, хтора почина нєшка, а тирва по 21. май.
Манифестация облапи велї вистави и провадзаци програми, як цо то креативни роботнї за дзеци и одроснутих, преподаваня, промоциї, концерти, а тогорочна тема манифестациї „Мой музей, мой город”.
Програми буду на вецей локацийох у Вербаше – у Городским музею Културного центру Вербас будзе виложени етно-куцик, у Реформаторскей церкви уж нєшка на 18 годзин будзе преподаванє о историї пчоларства, а познєйше и други преподаваня.
У Ґалериї од 18. по 21. май будзе вистава фотоґрафийох „Мой музей – мой город”, у Биоскопе „Югославия” од 16. по 19. май буду приказовани филми о Вербаше, ту будзе отримана и дзецинска представа и подобова колония.
Основна музична школа будзе мац вецей концерти, а того року ше до манифестациї уключи и Народна библиотека „Данило Киш”, з програму „Мали детективи у Вербаше”, хтора будзе 18. мая.
Уход за публику кажди дзень од 10 до 22 годзин будзе безплатни, а манифестацию „Музеї Сербиї, дзешец днї од дзешец до дзешец” ше, як и прешлого року, отримує под покровительством Министерства култури и информованя.