РУСКИ КЕРЕСТУР – Место за фашенґи, културни дїяче, заняти у културних инсиституцийох, дакедишнї и терашнї члени активни у културним живоце Руснацох зоз Коцура, Миклошевцох и Руского Керестура, баловали ше всоботу, 29. октобра у сали Ресторана „Червена ружа”.
На балу грали „Коцурски бетяре” котри свой репертоар прилагодзели нагоди и бул полни з рускима шпиванками на котри ше могло танцовац. Атмосфера була приємна и весела, як ше и швечи на балу.
Попри того же обезпечели добру музику, орґанизаторе обдумали и интересанти бависка за учашнїкох, а обезпечели и красни награди.
Награди обезпечела и наша НВУ „Руске слово”, Национални совит Руснацох и Ивона Будински зоз своїма козметичнима продуктами „Ивона”.
Бал отворели Адриана Надь Барна и Златко Рац и з тей нагоди освоєли награду, на рулет танцу награду освоєли Александра Варґа и Звонко Русковски, а ище єдну награду освоєла Клара Катрина.
Як и вше, на балу було весело бо после пар рокох нєактивносци, шицким хиби розвага, приємна атмосфера и кус вешеля. Хто бул, пошол дому задовольни, а хто нє бул, придзе на рок!
