КЛЯЇЧЕВО – У 19. колу Подручней фодбалскей лиґи Зомбор, всоботу 25. марца, Русин зазначел першу побиду у ярнєй часци сезони, процив екипи Кордун зоз Кляїчева, хтору надвладал зоз 1:0. Ґол за Русин дал Филип Вуйович.
Од самого початку, домашнї превжали инициятиву и рушели зоз швидкима нападами на Русинов ґол. Ґолман Кронич мал даскельо добри интервенциї, но цали перши полчас прецекол зоз доминацию домашнїх.
Уж на старту другого полчасу, Русин конєчно почина бавиц у своїм препознатлївим стилу. Домашнї вецей запинаю цо приводзи до оштрейшого бависка зоз надосц фаулами.
У 76. минути, после фаула над Янком Куличом, Филип Вуйович успишно виводзи пенал, медзитим, домашнї зауважую же станул скорей копнуца, та вимагаю же би ше пенал повторелo, цо судия нє прилапює. У истей хвильки нєзадовольни бавяче домашнього Кордуну, нападаю судию и од того моменту, у 15 минутох, подзелєни 7 жовти и 4 червени картони.
У шлїдуюцим колу, на нєдзелю 2. априла, на 16 годзин, Русин дочека екипу Жак зоз Зомбору.