КРИЖЕВЦИ – Промоция кнїжки Милени Врбашки и маґистра Драґойли Живанов „Арсениє Теодорович и Арсениє Маркович – двoмe уметнїки Новосадянє у Крижевскей епархиї“, хтору видала Новинарска асоцияция Руснацох – НАР, отримана пияток, 4. октобра у конзисторней сали бискупскей резиденциї у Крижевцох.
О кнїжки бешедовали музейна совитнїца и єдна з авторкох Драґойла Живанов зоз Нового Саду, рецензентка доктор професор на Акедемиї подобових уметносцох у Беоґрадзе Александра Кучекович, автор фотоґрафийох Йоаким Ерделї зоз Петровцох и координаторка проєкта Єлена Перкович. У мено домашнїх присутних поздравел координатор култури у Крижевским ординарияту Озрен Боґданович.
Координаторка проєкта Єлена Перкович о упечаткох зоз промоциї гварела же публика була барз заинтересована за студию о двох визначних сербских, новосадских уметнїкох осемнастого и дзеветнастого вика хтори охабели значни уметнїцки шлїд у грекокатолїцких церквох у Руским Керестуре и Коцуре, а окреме же тота студия обрабя по тераз нєпознати иконостас Теодоровича и Марковича котри пренайдзени у Горватскей односно у Стойдраґи при Самобору. Иконостас хтори нашол проєктни тим НАР-у бул першобутни иконостас у катедралней грекокатолїцкей церкви у Крижевцох и там стал по конєц дзеветнастого вику одкадз є премесцени до Дишнику, а познєйше до спомнутей Стойдраґи.
Часц студиї „Арсениє Теодорович и Арсениє Маркович – двoмe уметнїки Новосадянє у Крижевскей епархиї” пошвецена и портрету крижевского владики Константина Станича, дзе указане же автор того портрета Арсениє Теодорович, цо було мало познате и академскей заєднїци и ширшей публики.
Промоция у Крижевцох отримана зоз потримовку Покраїнского секретарияту за науку и високе образованє як и нєсебичну помоцу Крижевскей епархиї.