ВЕРБАС – У просторийох Явней библиотеки „Данило Киш” у Вербаше була отримана пригодна святочносц на котрей найуспишнєйшим школяром додзелєни награди, за найлєпши роботи на традицийним литературно-подобовим конкурсу з нагоди Дзецинского тижня. Тема конкурсу була як и сам мото манифестациї – „Я дзецко, мам план: толеранция и любов за кажди дзень”.
Медзи найлєпшима литературнима и подобовима роботами нашли ше и роботи школярох зоз коцурскей Основней школи „Братство єдинство” и наймладших зоз Предшколскей установи „Бошко Буха” – Оддзелєня „Герлїчка”.
Награди за свойо литературни твори на задату тему достали Ива Сабадош, Владимир Горняк и Лука Арх зоз IV3 класи, як и Йована Бєкич и Марина Макаї зоз VIII3 класи.
Награди за подобово твори на конкурсу достали Исидора Секулич зоз „Герлїчки”, и школяре Tара Бокан зоз II2 класи, Матей Буила зоз руского оддзелєня III1 класи, Милия Радошевич зоз IV2 класи и Дьордє Сердар зоз IV3 класи.
На святочносци и уручованю наградох присуствовали и школяре зоз коцурскей Основней школи, вєдно зоз своїма менторами Виолету Рашета, Валерию Папуґа, Миряну Бокан, Марию Полдруги и Бояну Петрович.
Одлуку за наградзени роботи принєсол жири у чиїм составе спред Явней библиотеки бул Бранислав Зубович котри оценьовал литературни роботи, а спред Културного центра Вербасу була Силвиа Єлачич котра оценьовала подобово роботи.
