МИКЛОШЕВЦИ (РЕПУБЛИКА ГОРВАТСКА) – У Доме култури Миклошевци 29. и 30. авґуста 2025. року отримана ювилейна 40. Културна манифестация „Миклошевци 2025”, а источашнє означена и 75. рочнїца снованя КУД „Яким Ґовля”.
Пияток, 29. авґуста, програма почала зоз отвераньом вистави малюнкох членох здруженя „Уметносц у живоце” Миклошевци у голу Дома култури и роботню енкаустики за дзеци хтору водзели Соня Папуґа и Зденко Бики.
У сали могло поопатрац виставу ручних роботох „З рускей кухнї” дзе виложени вишивани хлєбовки и фартущки, полїчку зоз приготовену жимнїцу и велї предмети зоз прешлосци. Тоту виставу порихтали Сара Красник и Владимир Мишлєнович.
На тему рускей кухнї отримана и пригодна програма хтору на барз интересантни и интерактивни способ водзела Леся Мудри. На нєпоштредни способ дзеци, Женска шпивацка ґрупа, алє и публика, дознали вецей о стародавних єдлох и обичайох. Окрем даскелїх рецитацийох и веселих шпиванкох, на проєктору приказани и слики зоз свадзбох и дисновторох цо на окремни способ дочарало програму.
„Руску кухарку” на руским и сербским язику, хтору видала НВУ „Руске слово”, публики представела єй авторка Блажена Хома Цветкович, а сликовнїцу за дзеци „Кухня” Ясмина Дюранїн.
Шицки присутни могли покоштовац дзепоєдни стари руски єдла и дружиц ше у приємней атмофсери на програми „Смаки традициї” у орґанизациї госцолюбивих Миклошевчаньох.
Тогорочна манифестация отримана дзекуюци домашньому КУД „Яким Ґовля”, а под покровительством Совиту за национални меншини Републики Горватскей и сопокровительством Општини Томповци и Союзу Русинох Републики Горватскей.
