БИКИЧ – На турню Церкви Успениє Пресвятей Богородици, вчера 10. децембра подприємство з околїска Вершцу положело нови пошвецени криж и оправели плехове закрице на турнї.
Най здогаднємє, церква очкодована у велькей бурї 19. юлия 2023. року. Дзекуюци локалней самоуправи у Шидзе и донатором з валалу и иножемства, обезпечени средства за нови криж. Преосвящени владика кир Георгий Джуджар пошвецел криж 14. септембра, як и финансованє роботи на його кладзеню на турню и санацию плеху на турнї.
