НОВИ САД – На Радио програми по руски нєшка на 12:30 годзин, будзе емисия Дом и фамелия, а на 21:30 годзин Емисия за младих.
У емисиї Дом и фамелия госцинска будзе психолоґa Соня Алексич зоз Руского Керестура котра направела интересантне дружтвене бависко за родичох и за мацери – карточки зблїжованя и самопомоци. О яких карточкох слово и дзе их мож купиц, годно дознац у емисиї. Побешедує ше и зоз Надицу Цапову, психолоґу и социялну роботнїцу о парняцким насилстве котре барз присутне у школох. У Коцуре ше пририхтує Капушнїк фест, манифестация котра од забуца чува старе руске єдло, як будзе випатрац манифестация учує ше од директора Туристичней орґанизациї Вербас Славиши Сабадоша. Рецепт за кремпиту дозна ше од Ксениї Варґа зоз Руского Керестура.
Емисию Дом и фамелия мож послухац кажду стреду на 12:30 годзин на на УКТ габох радия РТВ на 92, 100 и 107,1 мгг. Реприза емисиї на соботу на 7 годзин, а мож ю послухац и на одложеним слуханю на сайту Радио-телевизиї Войводини. Редакторки емисиї Наталия Дудаш и Саня Маркович.
У Емисиї за младих, нєшка на 21:30 годзин, годно послухац послухац розгварку зоз Теодору Рамач з Нового Саду, школярку трецей класи ґимназиї Светозар Маркович. Вона одгадла прецо ше уписала до тей стреднєй школи, потим виприповедала як ше знашла у новинарскей секциї на хтору ходзи у школи, о волонтираню алє и о своїм шлєбодним часу. Потим будзе прилог зоз вечара дружтвених бавискох, хтори отримани
всоботу, 24. януара у Руским Керестуре у орґанизациї Пактрутенорум. Друга часц емисиї резервована за нашо предклади популарних друштвених бавискох, як их бавиц и до нїх мож дойсц.
Емисия за младих ше емитує премиєрно каждей стреди на УКТ габох радия РТВ на 92, 100 и 107,1 мгг, на 21:30 годзин и репризно штварток на 12:30 годзин, а мож ю послухац и на одложеним слуханю на сайту РТВ. Редакторки и водительки емисиї Ванеса Медєши и Мирела Тимко.
