НОВИ САД – На Радио програми по руски нєшка на 12:30 годзин, будзе емисия Дом и фамелия, а на 21:30 годзин Емисия за младих.
У емисиї Дом и фамелия годно послухац прилог хтори порихтани у нащиви фамелиї Симунович у Суботици. Зоз Наталию и Кирилом Симунович ше побешедовало о пензионерских дньох и живоце медзи Руснацами у Суботици. Тиж у Суботици жиє и Татяна Божич котра член Дружтва Руснацох и шпива у Мишаней шпивацкей ґрупи у Дружтве Руснацох.
У емисиї ше будзе бешедовац о старей-новей инициятиви родитель –старатель котра би конєчно могла буц прилапена и реализована. О тим ше бешедовало зоз Сандру Колєсар Панайотов зоз Коцура.
Приблїжую ше лєтни одпочивки и виглєдованя хтори би ше туристични места могло нащивиц. Злата Надь Роман зоз Нового Саду, вецей раз нащивела Єгипет и то було єднo з путованьох котре на ню охабело окремни упечаток.
Емисию Дом и фамелия мож послухац кажду стреду на 12:30 годзин на УКТ габох радия РТВ на 92, 100 и 107,1 мгг. Реприза емисиї на соботу на 7 годзин, а мож ю послухац и на одложеним слуханю на сайту Радио-телевизиї Войводини. Редакторки емисиї Наталия Дудаш и Саня Маркович.
У Емисиї за младих, нєшка на 21:30 годзин, будзе слова о квиз-змаганю Кельо ше познаме, хторе и того року отримане у Новим Садзе. Всоботу 30. мая отримана схадзка Роботного цела за младих за котре Национални совит предложел нового предсидателя. Госцинска и у тей емисиї будзе Яна Варґа зоз Руского Керестура.
Емисия за младих ше емитує премиєрно каждей стреди на УКТ габох радия РТВ на 92, 100 и 107,1 мгг, на 21:30 годзин и репризно штварток на 12:30 годзин, а мож ю послухац и на одложеним слуханю на сайту РТВ. Редакторки и водительки емисиї Ванеса Медєши и Мирела Тимко.
