КОЦУР – Перша провадзаца програма у рамикох тогорочней 46. Културней манифестациї „Коцурска жатва” и стретнуца младих у Коцуре отримана вчера, 10. юлия, у Етно клубу „Одняте од забуца”.
У предполадньових годзинох орґанизаторе спред КУД „Жатва” привитали наймладших на роботнї котру пририхтал и водзел Марко Буила. Тота Културна манифестация уж шести рок почина зоз змистом за наймладших. По Буилових словох, и того року ше намагали научиц дзеци дацо о рускей традициї и култури, як то було и предходних рокох, та тема була вязана за свадзбу, односно свадзебни венєц на глави млодей.
Роботня почала зоз бависком, з асоцияциями, дзе дзеци на креативни способ одгадовали о чим будзе бешеди того дня. Дзеци пообиходзели и музей, а предсидателька Етно клубу Аранка Медєши и Рада Лазор им потолковали як тот венєц випатрал, як бул прикрашени, а и як млода дакеди випатрала.
Роботня мала и свою подобову часц, та наймладши зоз билима ружичками, перлами и другима прикрасками билей фарби прикрашовали свойо свадзебни венци, а котри буду виложени под час манифестациї у Доме култури.
Роботня за дзеци отримана як увод и перша часц єдней з провадзацих програмох тогорочней Културней манифестациї у Коцуре.
