НОВИ САД – На швето святих верховних апостолох Петра и Павла, внєдзелю, 12. юлия Новосадянє преславели Кирбай зоз Архиєрейску Службу Божу и епархом владиком Георгийом Джуджаром, велїма паноцами, монахинями и госцами.
У конкатедралней Церкви святих апостолох Петра и Павла у Новим Садзе, шветочну кирбайску Архиєрейску Службу Божу предводзел кир Георгий Джуджар и у казанї повинчовал благословени Кирбай зоз словами же святи апостоли Петро и Павле дали свой живот за Святу Церкву, же вони нам нє лєм приклад, алє и драга по якей треба исц. Вони мали тварду виру и вельку любов до Бога. И нам треба мац и тварду и розумну виру. Прето ше будземе модлїц нєбесним покровительом же би нам помогли зачувац нашу виру же би остала жива и же бизме мали горуцу любов до Створителя.
З владиком Георгийом служели совитнїк у апостолскей нунциятури у Беоґрадзе монсиньор Лука Сартори, декан бачки и парох у Коцуре о. Владислав Рац, парох у Бачинцох о. Юлиян Рац, єромонах зоз Иванофранкивсей семинариї о. Роман Кандрач, священїк зоз Дюрдьова о. Михаїл Холошняй, капелан у Кули о. Платон Салак, ЧСВВ, капелан у Руским Керестуре о. Ярослав Варґа. Апостол читал архидиякон зоз Крижевскей епархиї Антониє Паїч, дїяковали богослов зоз Крижевскей епархиї Александар Крнєшин и новосадски дзияк Александар Саванович, а шпивал Хор конкатедралней церкви святих Петра и Павла под руководством Борута Павлича.
На богослуженю були и совитнїк городоначальнїка Нового Саду Петар Дюрдєв, о.д. директора Покраїнского заводу за защиту памятнїкох култури др Владимир Кубет и о.д. директора Заводу за културу войводянских Руснацох Рената Вуясинович, представнїки Националного совиту Руснацох и других институцийох и установох.
На концу, домашнї парох новосадски о. Дарко Рац привитал и подзековал шицким на заєднїцтве у преслави Кирбая. После Служби Божей було мированє.