КОЦУР – Єдна з провадзацих програмох другого дня тогорочней „Коцурскей жатви” и стретнуца младих було и отверанє и представянє богатих етно столох на площи опрез Дому култури.
Домашнїх и госцох на манифестациї привитала предсидателька Активу женох КУД „Жатва” Коцана Колєсар и поволалала их най покоштую шицко цо вредни коцурски жени приготовели з тей нагоди.
На столїкох, як то уж и традиция, були виложени вельочислени руски єдла яки пририхтовали нашо баби, алє и други сербски и мадярски єдла зоз старших и новших часох. Нащивителє ше могли здогаднуц як випатрал и цо ше находзело у дакедишнїм пасарайтове, и шицко покоштовац.
Числени валалчанє и госци з других местох того дня уживали у найсмачнєйших єдлох. Жени зоз Активу женох КУД „Жатва”, вєдно зоз женами з Активу женох КУД „Завичайне врело” и численима женами з валалу збогацели и засмачели тогорочну коцурску манифестацию.
Окрем богатих етно столох, у центру валала бул и мали предайни базар, а могло и покоштовац домашнє пиво, купиц нєзвичайни палєнки, колачи и други домашнї продукти. При наймладших зоз „Малей роботнї”, котрих водзи Милка Фейса, нащивителє могли купиц предмети котри дзеци сами прикрашели або направели, и на таки способ гуманитарно помогнуц.
Бул и штанд НВУ „Руске слово” на хторим нащивителє могли купиц кнїжки зоз його видавательства, а по знїжених ценох 30 одсто, як то уж традицийно на наших манифестацийох.
Вельке число нащивительох виполнєло центер валала през цале пополаднє, цо потвердзело же и тота часц манифестациї була успишна.
