КОЦУР – Тогорочна 46. Културна манифестация „Коцурска жатва” и стретнуце младих закончене всоботу вечар, 11. юлия, у Велькей сали Дома култури у Коцуре зоз централну преславу.
Нашо културно-уметнїцки дружтва зоз руских местох з Републики Сербиї, алє и зоз Републики Горватскей, ше одволали на поволанку домашнїх и представели ше зоз танцами и шпиванками.
Святочни концерт почал зоз интонованьом гимни Републики Сербиї „Боже правди” и руску шветочну шпиванкуа „Браца Русини”, а потим присутних привитали предсидатель Националного совиту рускей националней меншини Стеван Самочета и предсидатель општини Вербас Милан Ґлушац.
Програму тогорочней „Коцурскей жатви” отворели домашнї старши фолклораше КУД „Жатва” зоз танцом, а провадзел их оркестер КПД „Карпати” з Вербасу под руководством Любомира Сакача Андрия. Потим на бину вишла жридлова шпивацка ґрупа КПД „Карпати” з Вербасу, а з танцом ше представела и старша фолклорна ґрупа КУД „Завичайне врело”. Програму зоз шпиванку прикрашела и шпивацка ґрупа Дому култури „3. октобер” зоз Ковачици, а з фолклорну хореоґрафию виводзацка фолклорна ґрупа КУД „Тарас Шевченко” зоз Дюрдьова. Затанцовала и виводзацка ґрупа РКЦ зоз Нового Саду, як и старша фолклорна ґрупа Дому култури зоз Руского Керестура.
У предлуженю програми зашпивали аматере зоз Дружтва Руснацох зоз Суботици, а з богатим наступом ше представел и фолклорни ансамбл Дому култури „3. октобер”. На бину потим вишла шпивацка ґрупа КУД „Йоаким Гарди” зоз Петровцох, а шлїдзели танци фолклорней ґрупи ветеранох РКЦ, старшей фолклорней ґрупи КУД „Иван Котляревски” з Бикич Долу, як и стреднєй фолклорней ґрупи коцурского КУД „Завичайне врело”. Зоз шпиванку ше представели и аматере зоз шпивацкей ґрупи з КУД „Др Гавриїл Костельник” зоз Кули.
На концу святочного концерту домашнї, млади танцоше зоз старшей и стреднєй фолклорней ґрупи КУД „Жатва” одтанцовали Куцкуруши, а числена публика їх точку за конєц тогорочней „Коцурскей жатви” випровадзела зоз моцним аплаузом и поволанку на бис.
По законченю програми, предсидатель Орґанизацийного одбору „Коцурскей жатви” Микола Ґайдош подзековал шицким котри их потримали и вєдно з нїма преславели отримованє тогорочней традицийней културней манифестациї. Окремне подзекованє Ґайдош уручел, як гварел, особом котри важни карички у орґанизованю, роботи и участвованю на „Коцурскей жатви” уж велї роки – Моники Медєши, Любомирови Сакачови Андрийови, як и Александри Горняк. Програму того вечара водзели Силвия Маґоч и Денис Шанта.
Окрем Културно-уметнїцкого дружтва „Жатва”, отримованє културней манифестациї „Коцурска жатва” помогли Министерство державней управи и локалней самоуправи, Национални совит Руснацох, Завод за културу войводянских Руснацох, Покраїнски секретарият за образованє, предписаня, управу и национални меншини – национални заєднїци, Покраїнски секретарият за културу, явне информованє и одношеня з вирскима заєднїцами, Општина Вербас, Туристична орґанизация општини Вербас, Месна заєднїца Коцур, Културни центер Вербас, Дом култури Коцур.
