КОЦУР – У просторийох Явней библиотеки „Данило Киш” – Оддзелєню у Коцуре всоботу, 11. юлия, отримана ище єдна з провадзацих програмох тогорочней Културней манифестациї „Коцурска жатва” и стретнуца младих – вистава з котру представени 80 роки иснованя Активу женох КУД „Жатва”.
Присутних привитала библиотекарка Тат`яна Колєсар, а потим слово превжала актуална предсидателька Активу женох Коцана Колєсар. Бешедовала о функционованю здруженя, як и о його историї, активносцох яки коцурски жени ту запровадзую, подїйох на котрих поряднє участвую и шицко цо Актив женох през длуги 80 роки облапял. Тиж, з тей нагоди спомла и бувши предсидательки котри у даєдним периоду були на чолє Активу женох, а Рада Лазор и Олґа Сакач з присутнима подзелєли свойо искуства и здогадованя.
О Активу женох бешедовала и бувша библиотекарка Весна Радошевич Пешут, котра вєдно зоз його членїцами и порихтала виставу поставену у библиотеки. Пар слова гуторела и Мартица Тамаш, котра вєдно зоз Коцану зробела кнїжку о коцурским Активу женох. На длугорочносци, активносци и успихох Активу винчовали и предсидатель Националного совиту Руснацох Стеван Самочета, предсидатель Рускей матки проф. др Михайло Фейса и предсидатель општини Вербас Милан Ґлушац.
Предсидателька Активу женох Коцана Колєсар подзелєла подзекованя численим поєдинцом, здруженьом и установом котри их през шицки тоти роки провадзели и потримовали, а нащивителє могли покоштовац и єдла котри за тот ювилей порихтали його членїци.
