ВЕРБАС – Вчера, 16. марца, державна секретарка у Министерстве польопривреди и защити животного штредку Стана Божович нащивела Општину Вербас и наявела же Министерство потима три проєкти у вербаскей општини – вибудов канализациї, закончованє Централного построєня за пречисцованє одрутних водох (ЦППОВ) и ремедияцию Велького бачкого беґелю.
– Министерство польопривреди и защити животного штредку ше будзе намагац прейґ медзинародних програмох и институцийох обезпечиц нєобходни 3,2 милиони еври за закончованє канализацийней мрежи у вербаскей општини, бо то єден з условийох хтори Општина муши сполнїц за законченє вибудови построєня за одрутни води – виявела Божович.
За потримовку з фондох ЕУ, Министерство кандидовало праве проєкт за чисценє Велького бачкого беґелю, а вредни є вецей як 35 милиони еври.
З домашнїма, на чолє з предсидательом Дочасового орґану Општини Вербас Миланом Ґлушцом, державна секретарка обишла и ЦППОВ за општини Вербас и Кула, на чиїм законченю би, як поведзене, роботи мали буц предлужени до конца того мешаца.