КОЦУР – Коцурске здруженє младих „КУМ” на пондзелок, 5. марца, почина реализацию проєкта „Желєна школа” котри одобрени на конкурсу Реґионалного еколоґийного центру Австриї.
У тим проєкту облапени штреднї школи у општинох Вербас, Кула, Бачка Тополя и Нови Сад. У каждей школи плановане отримац штири преподаваня, а школяре буду уключени до роботньох и едукативних преподаваньох зоз обласци еколоґиї.
Перша школа у котрей буду отримани преподаваня о еколоґиї будзе Штредня польопривредна школа „Мезоґаздасаґи Искола“ у Бачкей Тополї. Преподаваня отрима Синиша Мали, студент Польопривредного факултету котри будзе бешедовац о отримуюцим розвою, як и Мелания Мали, студентка биолоґиї на Природно-математичним факултету котра школяром будзе бешедовац о лїковитих рошлїнох.
У проєкту облапени штреднї школи котри повязани зоз еколоґию, алє здруженє младих „КУМ” до проєкту уключело и Основну школу „Братство єдинство” з Коцура, як и Штредню школу „Петро Кузмяк” з Руского Керестура.
Здруженє „КУМ” за реализацию того проєкту од Реґионалного еколоґийного центру Австриї достало 6 770 евра.