ДЮРДЬОВ – У 28. колу Подручней фодбалскей лиґи Нови Сад, хторе одбавене 31. мая, фодбалере ФК Бачка 1923 зоз Дюрдьова победзели у стретнуцу зоз фодбалерами Сириґу зоз резултатом 2:1.
Пре моцни диждж и вельо води хтора ше затримовала на терену, тото стретнуце анї кус нє було лєгке. Перши ґол на стретнуцу дала домашня екипа, кед Деян Тривунович у 33. минути схопно копнул до лабди хтора закончела у процивнїцким ґолу. Пред конєц першого полчасу, у 44. минути, госци посцигли свой перши ґол и виєдначели резултат.
У другим полчаше обидва екипи ше намагали пременїц резултат. Цо ше и удало на концу стретнуца, у 90. минути, кед Бачка посцигла други, и остатнї ґол на стретнуцу.
После того кола Бачка ище вше на пиятим месце на таблїчки зоз штерацец и седем бодами. У шлїдуюцим колу дюрдьовски фодбалере ше стретню зоз фодбалерами Бачки зоз Беґечу.