Блокада трох мостох у Новим Саду

автор Рутенпрес
53 Опатрене

НОВИ САД – На дзень кед ше наполнєло три мешаци як спадло надкрице на Желєзнїцкей станїци и на Дзень Нового Саду, всоботу 1. фебруара, студенти у блокади орґанизовали блокаду трох новосадских мостох прейґ рики Дунай. Два мости Жежельов и Варадински були блокирани всоботу од 15 по 18 годзин, а на Мосце шлєбоди блокада тирвала длужей як 24 годзини.

Блокада трох мостох у Новим Садзе урядово почала всоботу 1. фебруара на 15 годзин. Студенти орґанизовано, пол годзини скорей, рушели перше ґу Жежельовому мосту, хтори найдалєй од кампусу, потим ґу Вараднискому и вец и ґу Мосту шлєбоди, през драгу ше ґу нїм приключовали велї гражданє.

Блокада тих трох мостох тирвала три годзини, а потим на 18 годзин зоз Жежельового и Варадниского моста людзе ше зляли на Мост шлєбоди дзе була наявена 24-годзинова блокада.

Студентом ше приключели и студенти зоз Беоґраду, хтори пияток сцигли пешо и на бициґлох до Нового Саду, алє и колеґове з других Универзитетох. Цали час зоз студентами були моторкаше и польопривреднїки на тракторох, хтори и вєдно зоз транспортну полицию стали на розкрижйох улїцох хтори були заварти за транспорт.

Понеже нє очекаване тельо вельо людзох, орґанизаторе нє пущали людзох на мости, алє лєм на початок моста з обидвох бокох. Так було и на Мосце шлєбоди дзе польопривреднїки зоз тракторами блокирали преход з єдного боку на други.

У Лиманским парку були орґанизовани рижни активносци, наступел хор, велї познати особи, а пущани и проєкциї домашнїх филмох.

Блокада Моста шлєбоди требала тирвац внєдзелю до 15 годзин, алє пре вельке число присутних отримани „граждански пленум” на хторим ше блокаду предлужело ище три годзини, и студенти поволали же би ше за тот час почисцело простор дзе отримани протест. На 18 годзин учашнїки блокади ше розишли, студенти рушели на факултети, а зоз моста пошли и пољопривреднїки на тракторох.

Представнїки власци твердза же вимоги студентох сполнєти, а студенти, хтори три мешаци у блокади, гваря же анї єдна їх вимога у подполносци нє сполнєта.

ПОВЯЗАНИ ТЕКСТИ