КОЦУР – У церковней сали Грекокатолїцкей церкви Успения Пресвятей Богородици у Коцуре внєдзелю дополадня, 21. децембра, отримани Каритасов крачунски вашар.
Нащивителє могли поопатрац и купиц рижни ручни роботи, декорациї и прикраски за наиходзаци новорочни и крачунски швета. Окрем тих, як и других понукнуцох котри викладаче порихтали, мож було купиц домашнї колачи, ґаґорки, як и бобальки котри порихтали волонтере коцурского Каритасу.
Представели ше числени викладаче зоз валалу, алє присутни були и викладаче зоз других околних местох. Виложени були и найновши виданя НВУ „Руске слово” по знїженей цени вочи наиходзацих шветох, а и наймладши зоз „Малей роботнї” представели свойо роботи котри вредно правели на отриманих роботньох у Каритасових просторийох зоз Милку Фейсову котра их водзи.
Рижнородне и богате понукнуце було за шицки смаки и кажде могол найсц по дацо за себе.
