КОЦУР – Швето Богоявлeнє Господнє, Трокралї по юлиянским календаре, означене и у грекокатолїцкей церкви Успения Пресвятей Богородици у Коцуре вчера, 19. януара.
Вельку Службу Божу служел декан бачки и парох коцурски о. Владислав Рац, а зоз своїма словами здогаднул присутних парохиянох на подїю кед Йоан Креститель покресцел Исуса у рики Йордан.
Богоявлeнє швето кед ше пошвеца и вода, а пошвецанє з тоту воду знак Божого благослову, на хасен духовному и тїлесному здравю. И того року парохиянє принєсли свойо канчови и фляши з воду котра на концу Служби пошвецена.
З пошвецену воду парох о. Рац пошвецел цалу церкву и шицких присутних, а на концу богослуженя, парохиянє могли присц и набрац води зоз судзини у котрей є пошвецена и однєсц до своїх домох.
З воду пошвецену на Богоявлeнє будзе и традицийне пошвецанє обисцох, котре почнє нєшка, 20. януара, и будзе тирвац по 1. фебруар.
