НОВИ САД – Нєшка, 14. децембра у рамикох манифестациї 34. Днї Миколи М. Кочиша на 11 годзин у просторийох Завода за културу войводянских Руснацох (Матици сербскей 15) будзе отримане Литературне стретнуце зоз хторим ше означи значни рочнїци зоз Календара у 2024. року Дружтва за руски язик, литературу и културу.
На стретнуцу ше пригодно означи 150 роки од народзеня o. Mихайла Мудрого, 120 роки o. Maксимилияна Буили, 120 роки Янка Фейси, 110 роки Якима Олеяра, 100 роки др Меланиї Микеш, 90 роки Наталиї Голуб, 90 роки Надї Волчко, 80 роки Ирини Гарди Ковачевич, 80 роки Нади Колєсар Адамович и 60 роки др Анни Плишковей.
34. Днї Миколи М. Кочиша почали 5. децембра у Руским културним центру кед програму пошвецену литературней творчосци Миколи М. Кочиша отримали школяре хтори уча руски язик у новосадских школох.
Потим 6. децембра у просторийох Завода за културу войводянских Руснацох отримана 3. схадзка Скупштини Дружтва за руски язик, литературу и културу и Округли стол – 50 роки Ґраматики руского язика Миколи М. Кочиша (1974) и промоция нового Зборнїка роботох Studia Ruthenica 30, 2024.