НОВИ САД – У рамикох манифестациї 34. Днї Миколи М. Кочиша у просторийох Завода за културу войводянских Руснацох всоботу, 14. децембра отримане Литературне стретнуце зоз хторим означени значни рочнїци зоз Календара у 2024. року Дружтва за руски язик, литературу и културу.
На соботовим Литературним стретнуцу присутни ше здогадли на рочнїци визначних Руснацох. З тей нагоди означене 150 роки од народзеня o. Mихайла Мудрого, 120 роки o. Maксимилияна Буили, 120 роки Янка Фейси, 110 роки Якима Олеяра, 100 роки др Меланиї Микеш, 90 роки Наталиї Голуб, 90 роки Надї Волчко, 80 роки Ирини Гарди Ковачевич, 80 роки Нади Колєсар Адамович и 60 роки др Анни Плишковей.
34. Днї Миколи М. Кочиша почали 5. децембра у Руским културним центру кед програму пошвецену литературней творчосци Миколи М. Кочиша отримали школяре хтори уча руски язик у новосадских школох. Потим 6. децембра у просторийох Завода за културу войводянских Руснацох отримана 3. схадзка Скупштини Дружтва и Округли стол – 50 роки Ґраматики руского язика Миколи М. Кочиша (1974) и промоция 30. числа Зборнїка роботох Studia Ruthenica.
У рамикох манифестациї 34. Днї Миколи М. Кочиша 30. новембра отримана ХХ подобова колония „Стретнуце у Боднарова” у Ґосподїнцох.
Планує ше отримац и Схадзку активу вихователькох руского язика у Руским Керестуре – 120 роки предшколского вихованя, у сотруднїцтве зоз ПУ „Бамби“, Оддзелєнє „Цицибан“ у Руским Керестурe и Одбором за образованє Националного совиту Руснацох.
Тогорочни 34. Днї Миколи М. Кочиша орґанизовало Дружтво за руски язик, литературу и културу зоз потримовку: Покраїнского секретарияту за образованє, предписаня, управу и национални меншини–национални заєднїци, Покраїнски секретарияти за културу, явне информованє и сотруднїцтво з вирскима заєднїцами и Националного совиту рускей националней меншини Сербиї.
