РУСКИ КЕРЕСТУР – 57. Драмски мемориял Петра Ризнича Дядї почина на пияток 21. марца и будзе тирвац по пияток 11. априла.
По розказу будовательного инспектора, хтори нєдавно нащивел будинок Дома култури, пре безпечносц, хаснованє цалей бини нєдошлєбодзене, а нє лєм просцениюму, односно часци опрез бини, як було потераз спозорене. Пре тоту причиниу, шицки представи за старших на тогорочним Мемориялу буду виведзени у Културним центре у Кули, провадзаци змисти буду виведзени у „Клубу 10” керестурского Дома култури, док два дзецински представи буду одбавени у Школи „Петро Кузмяк”.
Мемориял почнє на пияток 21. марца на 19:30 годзин зоз отвераньом вистави костимох КОЦ АП „Бранислав Нушич” зоз Шиду, а потим на 20 годзин будзе отримана промоция ЦД-а „Генцаре” Владимира Малацка у „Кулубу 10”.
На соботу 22. марца на 20 годзин будзе виведзена представа Ивана Франка „Бутка число 27ˮ, у режиї Владимира Надя, хтору одбавя члени Драмского студия „АРТˮ Дома култури Руски Керестур, а представа будзе виведзена у Културним центре у Кули.
У Културним центру у Кули, на стреду 26. марца на 18 годзин, будзе виведзена и представа „Петро Панˮ по тексту шкотского писателя Джеймс Метю Перуа, у режиї Ребеки Планчак и Мирослава Малацка, хтору виведзе дзецинска секция Драмского студия „Артˮ.
Вечар ювилантох пошвецени Любомирови Дудашови Инґейови, з нагоди 70 роки од його народзеня, и будзе на соботу, 29. марца, на 20 годзин у „Клубу 10” у Доме култури.
За нєдзелю, 30. марца на 20 годзин заказана представа „Полицає” Славомира Мрожека, у режиї Янка Лендєра зоз Вербасу. Зоз представу наступя ґлумци РНТ „Петро Ризнич Дядя”, а виведзена будзе у Културним центру у Кули.
Кед слово о дзецинских представох, вони буду одбавени у Школи „Петро Кузмяк” та на пияток 4. априла на 12 годзин Руске културно-уметнїцке дружтво „Др Гавриїл Костельник” з Кули виведзе представу „Важне писмо” по тексту Михала Ковача, а у режиї Нади Лендєр з Вербасу.
Тогорочни Мемориял будзе закончени зоз представу „Инсталуй и ти дїдов дж пи ти (GPT)ˮ Руского народного театру „Петро Ризнич Дядя”, правену по тексту Ирини Гарди Ковачевич и Славка Ороса, а виведзена будзе на пияток 11. априла тиж у Школи „Петро Кузмяк” на 12 годзин.