Вихасновац свойо права цо нам зоз Законом припадаю значи же ше стараме нє лєм о себе, алє и о тих цо су коло нас, пре тих цо були пред нами и цо приходза после нас. То нїтка хторa ше нє шме претаргнуц. А то и наша обовязка, по хторей нас визнача як народ хторому важне чи останє, або нєстанє. А, то нє так чежко – у шицких обласцох, лєм треба почац на власним мацеринским язику.
Вошли зме до ище єдного нового року, вельо койчого зме заплановали же поробиме, вельо зме уж и поробели, а тото цо нас женє на нови идеї то и роботна и морална обовязка, и длужносц и одвичательносц спрам народу хторому припадаме. Каждого у своєй обласци. Прето же лєм вєдно можеме вецей витвориц, и лєм вєдно зме годни зачувац тото цо маме. Вельо раз уж поведзене яке важне дзбац нє лєм о себе, алє и о дружтвеним живоце Руснацох, односно о руским образованю, информованю, култури и хаснованю руского язика и писма. Так повесц, руски язик и писмо основа гевтим тром обласцом и штвартей хтора ше одноши лєм на язик и писмо, дзе исти тот язик мож хасновац и службено. Так же час уж тото раз освидомиц. Як нам може нє завадзац кед накарадно виписани табли „по руски”, або же таки народ а нє ма дзеци у руским оддзелєню, або же скоро шицко цо ше понука од паперох, документох, по сербски….?
И док ше члени Одборох за образованє, информованє, културу и службене хаснованє язика и писма намагаю цо вецей зробиц дацо за Руснацох, вельо раз ше ми видзи же припаднїки нашей меншини нє маю нїч процив, алє лєм кед би ше сами коло дачого нє мушели анґажовац. (Чесц винїмком). Нєанґажованосц и нєосвидоменосц вредному, писменому рускому народу, як за нас други гуторя, то якош нє швечи.
Свою одвичательносц, кед ше прилапели тей роботи, похопели и члени Одбору за службене хаснованє язика и писма Националного совиту Руснацох. Їх робота найбаржей вязана за комуникованє зоз локалнима самоуправами, односно провадзенє шейсцох локалних самоуправох у хторих ше руски язик и писмо службено хаснує, же як тото право хторе припаднїком рускей заєднїци дате зоз Законом, вони запровадзую и чи го вообще запровадзую. У прешлим року послати питальнїки до Жаблю, Бачкей Тополї, Вербасу, Кули, Шиду и Нового Саду, праве зоз питанями о тим чи маю прекладательох за руски язик, чи оможлївюю Руснацом же би судски поступок мали на своїм язику, чи даваю одредзену суму за културни и медийни дїялносци, чи им понукню же би свойо особни документи мали по руски, чи маю сайти општини по руски, чи запошлюю у локалней самоуправи и гражданох зоз рускей националней заєднїци. Питальнїки зоз одвитами зме достали, алє нажаль, одвити хтори були неґативни ище у прешлих питальнїкох, од пред 5-6 роками, остали и далєй неґативни и то ясне же ше коло одредзених питаньох нїч нє поробело. У Одборе за службене хаснованє язика и писма млади и фахово особи, векшином правнїки и прекладателє и барз добре познаю закон и яки права маю нашо гражданє. Прето зме локалним самоуправом понукли сотруднїцтво и же би проблеми хтори нє можу ришиц кед наприклад маю проблем зоз прекладаньом таблох, документох, руску тастатуру ришовали вєдно з нами, най ше ґу нам обраца и дзечнє им поможеме. Кажде одкладанє и нєришованє проблема у єдинкох локалней самоуправи хтори ше по Закону муши ришиц, лєм додатни трошок за локaлну самоуправу, и нє за похвалу, а нам Руснацом, то на чкоду. Вериме же зоз нащиву и бешеду зоз орґанами лоалней самоуправи зме то годни вєдно ришиц, а будзе на хасен и рускей заєднїци, и локалним самоуправом.
Спрам Уредби од 1. януара 2024. року ше почало применьовац Закон о вименкох и дополнєньох Закона о занятих у автономних покраїнох и локалних самоуправох и Уредби о запровадзованю интерного и явного конкурса за роботнїкох службенїкох по хторих ше уводзи и розрабя условия и способ витворйованя правох припаднїкох меншинох на запошльованє, з цильом їх срозмирней заступеносци медзи занятима у одношеню на заступеносц жительства єдинкох локалней самоуправи и то як право першенства при запошльованю у ситуациї єднаких оценох зоз другима кандидатами, и полней ровноправносци медзи националнима меншинами и векшинским народом. Так як цо зме ше виборели же би медзи велїма менами музичних редакторох було и мено єдного Руснака, будземе ше намагац же би ше витворели и други права хтори припадаю Руснацом.
На Конференциї о Совитох за медзинационални одношеня хтора була нєдавно у Беоґрадзе окреме визначене же яке важне же би кажда локална самоуправа мала таки совит, тоти ЛС цо го уж маю же би ше анґажовали же би вон бул ище видлївши, а його члени же би вецей участвовали у особних и колективних правох меншинох. У тим процесу барз важни гражданє и їх инициятива, односно змоцньованє їх одвичательносци за стан у локалних заєднїцох у хторих жию. З другима словами Совит, односно його члени, треба же би розпатрели одлуки Скупштини општини хтори ше одноша на витворйованє ровноправносци националних заєднїцох и у вязи з тим дали думанє або порушали зоз законом предвидзени инициятиви защити їх правох у каждим сеґменту дружтвеного живота ‒ у образованю, привреди, у дружтвених одношеньох, же би заєднїца була заступена у средствох явного информованя, ровномирним запошльованю у явних службох, кед ше менує директорох явних установох, у мрежи предшколских и школских установох, службеним хаснованю язика и писма. Треба спатриц цо реални потреби гражданох и ситуациї у општини, а вязани за медзинационални одношеня. Же би ше то могло витвориц Скупштина општини, пред тим як принєше одлуки, треба же би материяли о таких питаньох скорей послала СМО, же би их вон могол розпатриц. Дотераз то було углавним обратно и материяли за Скупштину Совитом сциговали уж кед одлуки принєшени. Маме право реаґовац на шицки нєсполнєти права цо нам припадаю, и будзме того свидоми, та их вихаснуйме же бизме єдного дня пре тото нє бановали.