Цо дзень, цо два, и ту зме: сцигли виберанки. Нє будзем вельо о самих виберанкох, анї о тим за кого; маце розум, та можеце и сами одлучиц у якей жеми жадаце жиц и ви, и вашо дзеци, и у складзе зоз тим и гласайце. Єдине зоз чим вам будзем „скакац по глави” то же на виберанки мушице висц и гласац. За Перу, Дюру, лївих, правих, за кого сцеце, лєм гласайце, же би после нє було „йой, чом сом нє”. Єдноставно, нєт досц слова и простору же бим вам шицки арґументи начишлєл и розтолковал, алє можем вац дац даскельо причини пре хтори треба же бисце гласали.
Перша ствар, нє шицки исти. Нє знам анї чи треба трошиц слова на таке, алє айде, задумайме же треба. Паметаце дзеведзешати роки и хто теди бул на власци? Кед нє паметаце, питайце ше старшим най вам виприповедаю як то було кед на власци були СПС и СРС. Вец ше здогаднїце ДОС-а и поведзце ми чи вам було исто як и теди кед зме шицко плацели у маркох, гориво ше куповало на улїци, над главами нам лєцели ракети, а нашо шедзели у блаце декунґох. Га, нє исте, майку му, нє може буц исте. Надалєй, под час ДС-а, або под час СНС-а сце баржей чувствовали же тота жем идзе у даяким нормалним напряму и же ше дружтво розвива. Под час ДС-а, або под час СНС-а сце мали чувство же блато и „шлям” виплївали на поверхносц и забрудзели цале дружтво? На концу, и кед су шицки исти, вец их будземе меняц док ше конєчно нє зявя иншаки. Єдноставно, чом их нє меняц кед су исти, нє?
Друга ствар, ваш глас може пременїц ствари. Вше кед людзе нє сцели висц на виберанки бо їх глас нїч нє пременї, праве теди ше нїч и нє пременєло. Исти оставали на власци, и йойчанє остало исте, и напрям жеми остал исти, шицко остало исте, таке яке и було, бо ниа, мой глас нїч нє меня. А, можебуц, праве єден єдини глас може пременїц одношенє моцох и, можебуц, то праве ваш глас. Роздумайце о тим.
Треца ствар, од того чи и як будзеце гласац, завиши у якей жеми будзеце жиц идуци штири роки. Можебуц то нє будзе найидеалнєйша верзия, вироятно нє будзе анї точно гевта хтору жадаце, алє будзеце крочай блїжей ґу нєй, а то уж дацо значи.
Мам ещи громаду арґументи пре хтори би требало висц на виберанки, алє кед вам тоти хтори сом начишлєл нє досц, вец нєт смисла чишлїц далєй. А зоз другого боку, постої лєм єдна причина пре хтору би вам могло буц шицко єдно хто победзи – так вам добре. Добре вам кед нє мушице дацо знац бо знаце дакого, добре вам чекац на гранїци годзинами док други преходза за пейц минути, добре вам у жеми у хторей криминалци и старлети елита…Супер, кед вам так добре, вец нїч, нє гласайце, уживайце и валяйце ше у тим блаце хторе дави кажду надїю же може буц лєпше.
Становиска висловени у тим тексту виключно авторово
и нє вше одражую ушорйовацку политику новинох „Руске слово”