РУСКИ КЕРЕСТУР – У 20. колу Подручней фодбалскей лиґи Зомбор, хторе отримане внєдзелю 2. априла на Ярашу, фодбалере Русина угосцели старого ривала, екипу Жак зоз Зомбору, процив хторого однєсли побиду зоз 3:1 (1:1). Ґоли за Русин дали – Матей Саянкович, Янко Кулич и Боян Голик.
После даскельо препущених шансох, успишну акцию аж у 45. минути за Русин виводзи Саянкович хтори у специфичним слалому уходзи до 16 метерох и виєдначує резултат на 1:1. Було то єдно од слабших полчасох у тей часци сезони.
У другим полчасу, у єдней од акцийох, Саянкович прима лабду у 6-7 метерох од ґолу, домашнї бек го валя з хрибта, и то бул други пенал за Русин. Саянкович покалїчени и виходзи зоз терену, док бек достава жовти картон. Сиґурни зоз 11 метерох бул Янко Кулич.
Найупечатлївши момент случел ше при концу, кед капитен Голик виводзи шлєбодне бице зоз коло 20 метерох, зоз правого боку, лабда одходзи дзе ше зиходза горня греда и статива, а госцуюци ґолман нє сцигує анї одреаґовац.
За Русин бавели – Деян Кронич, Александар Кочиш, Боян Голик, Владан Вуйович, Деян Павлович, Филип Вуйович, Никола Циврич (Лука Иличич), Янко Кулич, Оґнєн Маркович (Деян Будински), Матей Саянкович, Андрей Малацко.
После того стретнуца, Русин и далєй други на таблїчки, з тим же му шлїдза даскельо чежши змаганя. Уж на соботу, 8. априла, Русин будзе госцовац у Челареве, дзе ше стретнє зоз домашнїм ЧСК, екипу хтора штварта на таблїчки, а хтора и озбильни кандидат за сам верх.