Хет-трик Матея Саянковича

автор а. медєши, фото: в. вуячич
400 Опатрене

РУСКИ КЕРЕСТУР – У 12. колу Подручней фодбалскей лиґи Зомбор, внєдзелю 30. октобра, фодбалере Русину ше на Ярашу стретли у сушедним дербию зоз Борцом зоз Бачкого Ґрачцу. Конєчни резултат бул 3:0 (2:0) за Русин, а шицки три ґоли дал Матей Саянкович.

Перши ґол посцигнути уж у 3. минти, а за нєполни 5 минути Русин дуплирал водство на 2:0. У обидвох ситуацийох найсталоженши бул ґолґетер Русина. После швидкого водства бавяче Русина змирюю лабду, та ше предлужело бавиц вельо опущенше гоч було досц полунагоди домашнїх.

У другей часци стретнуца, Саянкович дава и свой 3. ґол цо и його єденасти ґол у тей часци першенства. Треба спомнуц и пенал хтори направени над Черняком, а хтори зоз коло 11 метерох виведол Янко Кулич, но пенал остал нєреализовани понеже лабда пошла коло ґолу.

За Русин бавели – Деян Кронич, Боян Голик, Александар Кочиш (Стефан Тома), Владан Вуйович, Филип Вуйович (Деян Павлович), Александар Тома (Деян Будински), Янко Кулич, Оґнєн Маркович (Деян Чернок), Матей Саянкович (Александар Зорич), Андрей Малацко, Боян Бранкович.

Уж на соботу Русин одбави други општински дерби процив домашнєй Червинки. Будзе то єдно з найчежших госцованьох тей єшенї.

ПОВЯЗАНИ ТЕКСТИ