ПАЧИР – Прешлого тижня, кед у цалей Сербиї завял перши озбильнєйши шнїг тей жими, даскельо Керестурци, нащивителє Пачир банї, одлучели ше окупац у залядзеним термалним озеру и попри жимских условийох.
Пейцме шмели хлопи перше коло 15 минути пребували у цеплей води у завартей часци банї же би ше добре зограли, а потим виходзели вонка окупац ше у залядзеним озеру, почухац ше зоз шнїгом, же би порушали циркулацию орґанизма. Як гварели, поступок повторели даскельораз, а так их посовитовал искусни, локални нащивитель банї хтори таке „цепле-жимнеˮ купанє практиковал вецейраз.
По їх словох, на шнїгу було жимнєйше, бо вода под лядом мала коло 4-5 ступнї, док температура шнїгу була у минусу.
Таку файту купаня практикую и други нащивителє пачирскей банї, нє вельке число шмелих поєдинцох, цо потвердзеує же термални базени у Пачиру доступни през цали рок, без огляду на хвилю.
И попри тим, треба буц осторожни, бо така файта жимскей активносци нє без ризику, а окреме треба же би мерковали особи зоз високим або нїзким прициском и хоротами шерца.
