РУСКИ КЕРЕСТУР – Од 22. децембра, та по 7. януар, оквицени камиони, гуманитарни „Конвой зоз шерцомˮ будзе обиходзиц рижни места по цалей Сербиї и дзелїц пакецики и лакотки дзецом, а на мапи того року по першираз нашол ше и Руски Керестур.
Тот гумани ґест орґанизує Здруженє „Пайташ зоз Драги – вожаче зоз шерцомˮ хторе чишлї вецей як 500 вожачох камиона. Пияти рок дарую пакецики дзецом своїх погинутих або чежко хорих колеґох, док по треци раз акцию орґанизую у „Конвою зоз шерцомˮ кед зоз даскельо камионами обиду цалу Сербию.
Як обвисцую члени нашого Добродзечного огньогасного дружтва, тоти гумани вожаче свой приход до Керестура наявели за 24. децембер, на коло 15 годзин, та з тей нагоди поручую родичом же би их у тим термину зоз дзецми дочекали у центру валала, кед наймладшим хтори ше там найду у предвидзеним термину буду подзелєни лакотки.
Конвой руши 22. децембра зоз Бечею, по 25. децембер будзе ше рушац през Войводину, 26. децембра обидзе дзеци у околїску Шабцу, а 28. децембра Конвой руши спрам Краґуєвцу и Ужицу. Шлїдуюцого дня предефилує през Чачак, Лазаревац и Валєво, до Беоґраду сцигнє 30. и 31. децембра, а после Нового року Конвой предлужи спрам югу Сербиї.
През 16 днї, кельо вкупно тоти гумани людзе буду у Конвою, прейду вецей як 3.250 километри, а подзеля вецей як 1.000 пакецики хтори буду ношиц вкупно коло 100 камиони. Кажде дзецко достанє лакотки, а годно видзиц и нукашньосц кабини у камиону.
У Конвою буду участвовац и домашнї огньогасци зоз своїм камионом хтори руши 24. децембра зоз Керестура.