КОЦУР – У грекокатолїцкей церкви Успения Пресвятей Богородици у Коцуре преславене швето Рождество Христово, Крачун по юлиянским календаре.
У коцурскей парохиї на Крачунску Вилїю, 6. януара, служене Крачунске всеночне.
На перши дзень Крачуна, 7. януара, Крачунски служби були прикрашени зоз шпиваньом колядох числених вирних котри того святочного дня були у церкви. Вельку Службу Божу служел парох коцурски о. Владислав Рац, и з тей нагоди парохияном пренєсол винчованку владики кир Георгия Джуджара за швета Рождества Христового.
И тогорочне найрадоснєйше християнске швето провадзене зоз колядованьом у велїх домох. Коляди шпивали и тамбураше, алє и дзеци и млади котри ходза по шпиваню и винчованю.
Нєшка, на други дзень Крачуна, Собор Богородици и Обручнїка Осифа, а на шицких богослуженьох того дня будзе мированє. У Велькей Служби Божей на 10 годзин будзе участвовац и Церковни хор и хор вербаского КПД „Карпати”.
Того дня, после мированя на раншей Служби Божей, у церковней сали будзе отверанє вистави фотоґрафийох иконох маляра Арсения Теодоровича.
На вовторок, треци дзень Крачуна, Вельку Службу Божу на 10 годзин будзе предводзиц наш преосвящени владика кир Георгий Джуджар.
Крачун у Коцуре означую и православни вирни. У порти коцурскей православней церкви Успения Пресвятей Богородици на Вилїю и того року традицийно запалєни бадняк. Палєню бадняка, котре закончене зоз огньометом, присуствовали числени православни вирни.
