БЕОҐРАД – На 66. Беоґрадским сайме кнїжкох, вовторок, 24. октобра, на штанду беоґрадскей видавательней хижи „Архипелаґ” автор романа „Златно звонце” Микола Шанта бул госц и подписовац авторски прикладнїки.
Роман „Златно звонце” обявели вєдно видавательна хижа „Архипелаґ” и Новинско-видаветельна установа „Руске слово”.
У приємней атмосфери у присустве и других Архипелаґових авторох Снежани Милинкович и Ненада Йовановича, читаче виберали кнїжки и з часу на час приступали ґу автором же би ше им купену кнїжку подписало, а у дружтве одвичательного редактора и директора „Архипелаґа” Ґойка Божовича. Крашнє ше бешедовало о литератури, животних феноменох яки нас окружую, идентитетох, пречитаних и нєпречитаних кнїжкох, о живоце и статусу писателя у дружтве, о електронских виданьох кнїжкох и паперових виданьох и о шицким другим цо у домену писательского швета.
Шантови то була нагода заинтересовац колеґох писательох и редактора Божовича и за руску литературу, препоручиц даєдних руских авторох, як и догвариц промоциї авторского роману у наступним периодзе после Сайма кнїжкох у Беоґрадзе.
Роман Златно звонце мож купиц и у Руским слове, прейґ сайту и при рускословских заступнїкох, за 700 динари, а тоту, як и други кнїжки „Руского слова” мож наручиц и прейґ сайту https://knjizkiporuski.com.
Остатню верзию електронского Каталоґа кнїжкох „Руского слова” (обновена 23. октобра 2023) у ПДФ формату можеце зняц на тим линку.
