28. ОКТОБЕР – Народзел ше парох Макаї.
1466 – Народзел ше Еразмо Ротердамски, голандски гуманист, писатель, филолоґ и филозоф.
1636 – У Кембриджу, у америцкей держави Масачусетс, основани коледж Гарвард, найстарша образовна установа у ЗАД.
1886 – На острове Бидл у Нюйоржским пристанїщу предсидатель ЗАД Ґровер Кливленд окрил Скулптуру шлєбоди, дарунок Французкей, хтору направел Фредерик Оґист Бартолди.
1922 – Народзел ше священїк, редактор, хороводитель, културни и дружтвени дїяч. о. Михайло Макай (Руски Керестур, 28. октобер 1922 – 6. януар 2000). Основну школу закончел у Руским Керестуре, а до ґимназиї ходзел у Вербаше, Вараждинє и Ужгородзе. Богословски студиї Михайло Макай започал у Ужгородзе, предлужел у Калочи и Дякове, а докончел у Заґребе. За священїка го 18. юлия 1948. року, а перша служба була му на парохиї у Жумберку. Потим бул у Крижевцох секретар владики Гавриїла Букатка, а вец духовнїк богословох у Грекокатолїцкей семинариї у Заґребе и капелан заґребскей парохиї. Року 1960. пошол до Риму на постдипломски студиї у Институту за духовносц. Потим 1966. року пришол за пароха до Руского Керестура и бул меновани за викара перпе Бачкого, а вец Войводянского Викарияту. Водзел хорске шпиванє, у Крижевцох и Заґребе, а потим у Руским Керестуре обновел церковни хор св. Миколая. Парох Макаї, як го людзе волали, бул парох у Керестуре 32 роки, збудовал вельку салу у порти, хижу у парохиялним дворе, капеланию коло парохиї и хижу на поверх у Водици. Видал коло пейдзешат кнїжки, кнїжочки, брошури, скрипти и рижни публикациї, медзи нїма и молитвенїк Отче наш (1970), кнїжочку Закон Божи (1975)… О. Михайло Макай пензионовани 1998. року, а умар 6. януара 2000. року у шпиталю у Новим Садзе. Поховани є у на теметове у Руским Керестуре.
Нєшка Шветови дзень анимираного филма. Дзень ше означує од 2002. року и як Медзинародни дзень анимациї. Пионир кименатоґрафиї Емил Рейно приказал першу анимирану проєкцию 1892. року у Паризу, на його праксиноскопу.